XXV Лемківска Творча Осін

przez adminsl . · Opublikowano 10 października 2017 · Zaktualizowano 19 października 2017

Стоваришыня Лемків разом з партнерами – Стоваришыньом «Руска Бурса» в Ґорлицях та бургомайстром міста Крениця, Дарюшом Реськом, просят на ювілейну 25. Лемківску Творчу Осін. Буде она вынятковом, не лем з причыны ювілею самой подіі, але головні за справом ювілею 70. уродин єдного з найвыдатнійшых лемківскых творців – Петра Трохановского.

Од двадцет пятьох років Стоваришыня Лемків осінным часом просит на літературну гостину. Все єст она получена з вшануваньом дакой важной русиньской річниці ци подіі. Очывидным явит ся, же тогорічна Осін буде продолжыньом зачатых кінцьом квітня т.р. упамятнінь 70. річниці выселінь. В річницю першого транспорту (28. квітня/апріля) в ріжных важных для Лемків місцях проходили упамятняючы акциі, м.ін. одправлено меморальны богослужыня, одкрыто в явожняньскым лаґрі памятник лемківскым жертвам, зорґанізувано наукову конференцию присвячену акциі Вісла. Было мож взяти і участ в премєровых показах документального фільму Аж і слезы не старчыли ци послухати споминів выселенців.

Акция «Вісла» на все змінила вид Лемковины, а на єй народі назначыла незатерте пятно. Выразом болю, тугы, незміряного терпліня выкликаного выдертьом з гнізда для чысленных літератів стала ся іх творчіст. Тема выгнаня явит ся м.ін. в вершах Івана Русенка, Нестора Жылича, Меляниі Собин ци Штефаніі Трохановской, в прозі Михала Сандовича, Петра Мурянкы, Володислава Ґрабана і вельох інчых. Денекотры мали аж і нагоду презентувати ся перед публиком в попередніх едициях Лемківской Творчой Осени. Тема 70. річниці выселіня та 100. річниці ліквідациі концентрацийного лаґру в Талергофі буде вчас Осени піднята в отвераючій прелекциі др габ. Олены Дуць-Файфер другого дня подіі в Ґорлицях – початок 18.00 год. в Рускій Бурсі.

Лемківскы Творчы Осени сут нагодом, жебы ся стрітити з сучасныма писменниками з ріжных части Карпатской Руси і дознати ся про обшыри іх інспіраций. Перший ден тогорічной Осени присвячений буде найвыдатнійшому сучасному лемківскому творци – Петрови Мурянці (про тоту подію пишеме окремо гев). Гонорувати свого жытеля буде Mісто Крениця. Специйяльний бльок проґраму зачне ся о 17.00 год. в Старым Здройовым Домі.

Музычна част 25. Лемківской Творчой Осени певністю принесе вельо емоций. Запрезентує ся aж і Петро Мурянка, котрий по мастерскы послугує ся не лем пером, але і голосом. Тым разом выступит з молодом Лемкыньом – Леном Стефановском. Почути буде мож і Сусанну Яру, котра як нихто інчий інтерпретує композициі Петра Мурянкы, та ґрупу Терочка, яку веде Андрий Трохановскій, аранжациі котрого назначены сут талантом роду Трохановскых.