Вмер Януш Квока (1970 – 2024). Вічна Йому Памят!

З жальом інформуєме, што 5. листопада 2024 р. несподівано вмер бл. п. Януш Квока, член Стоваришыня Лемків, заанґажуваный в справы православной церкви, присутный в лемківскым світі.

Покійный Януш Квока вродил ся в 4. серпня 1970 р. в Наревці на Підляшы з родичів Петра і Валентины. По няню рід Покійного выходит з Ізб (ґорлицкого повіта).

Завершыл маґістерскы студия в напрямі фінансів і рахунковости на Економічній Академіі во Вроцлаві.

В 2000 р. в православній церкви св. Архістратига Михаіла в Пшемкові вінчал ся з Івоном Демян. В 2006 р. пришла на світ іх дівка – Ксеня.

Януш Квока належал до поколіня люди, якы хотіли творити дашто добре і цікаве на благо свого народу. Был активным членом Кружка Стоваришыня Лемків в Любіні. Каждого рока брал участ в локальных, любіньскых святкуванях Дня Русинів Польщы. Як делеґат Кружка брал участ в Х Конґресі Стоваришыня Лемків, якій одбывал ся в квітни/апрілю т.р. в Ліґници. Все был присутный на лемківскых подіях. Вюл цікавы бесіды о нашых справах, пропонувал діяня в ціли покріпляня лемківской культуры на західніх землях – чужыні. Кєд лем міг – одвиджал рідну Лемковину.

Был добрым, теплым мужом та няньом. Все в першій черзі дбал о своіх близкых.

Бл. п. Януш Квока загынул траґічно в наслідстві нещестливого выпадку.

Жені Івоні, дівці Ксені, мамі Валентині, братям: Мирославови, о. ігуменови Штефанови, Юрийови і Петрови та дальшій родині і близкым Покійного высловлюєме щыры слова спілчутя.

Вічна Йому Памят!

Похоронны богослужыня зачнут ся в віторок, 12. листопада в любіньскій церкви св. Тройці (Парастас з чытаньом Псалтыря).
Похоронна Літургія буде одлсужена в середу (13. листопада), а пак одведіня Покійного на цмонтрів (Обора к. Любіна).