Łemkowski Rocznik / Лемківскій Річник – 2020

Стоваришыня Лемків выдало «Лемківскій Річник» 2020, котрый тыкат ся вельох важных річниц і подій, якы проходили на Лемковині і Чужыні в минулым році. Публикация єст уж доступна і мож ю чытати – а єст што, бо тогорічне выданя має близко 200 сторін, на вельо більше як попередні річникы. Вельо заслуг мают в тым авторы дописів, котры не ограничали ся в словах.

Перше треба повісти, кому тот Річник єст посвяченый. 2020 рік был богатый в розмаіты подіі і річниці – тоты позитивны, котры споминат ся з нутком сентименту, як і неґативны, што взагалі не хтіли бы сме, жебы до них дошло. Дана публикация єст посвячена 130. річници народжыня Івана Русенка і 60. річници його смерти, посвячена єст тіж памяти пересeлінь до Росиі, котрых 80. річниця проходила в минулым році. Не забыват ся тіж в Річнику о 40. річници першой Ватры в Михалові. На жаль треба доповісти, же 2020 рік записал ся нам вшыткым не лем під знаком епідеміі, але тіж (або предовшыткым?) смерти Богдана Ґамбаля, шефредактора і творці першого лемківского радия і порталю ЛЕМ.фм, котрый по долгій хвороті одышол до ліпшого світа 2. липця/юлия 2020 р.

О тым роздертю, же з єдной стороны ся тішыме з позитивных подій, а з другой смутиме з причыны смерти добрых люди, пише во вступі головный редактор публикациі Севериян Косовскій. Од него найліпше зачати лектуру «Лемківского Річника» 2020. Якa єст структура тогорічного выданя? Якых авторів можеме чытати? Котры дописы сут особливі інтересуючы, а котры тыкают ся новых тем?

«Лемківскій Річник» 2020 поділеный єст традицийно на три части: Подіі, Люде і Ювіляре. Книжку отверат обшырный допис Анны Кырпан з Івано-Франківска на Украіні про переселіня до Росиі, якых початок датує ся на 1940 рік. Авторка, котра сама походит з родины переселеных, єст найліпшом особом, якій мож было запропонувати таку тему. Результатом єй працы єст допис, котрый має більше як 50 сторін. Заохочаме чытати, бо мож дознати ся барз вельо деталів і фактів о істориі лемківского народа з того часу. Наступным дописом з части Подіі єст статя Андрия Копчы з нагоды 40-літя першой Ватры в Михалові, на Чужыні. З обшырного допису дознаме ся про дрібниці звязаны з першыма Ватрами, котры проходили на взір славной Ватры в Низкым Бескіді. В публикациі можеме обзерати тіж выставу знимок Андрия Копчы, што вказуют давны часы. Першу част «Лемківского Річника» 2020 заперат статя Демка Новака, історика і архівісты з Біча, про історию суду, якій мал возникнути в ХІХ столітю в Ґладышові, але николи до того не дошло. О обставинах, в якых діяли австрийскы суды в Ґалициі, та причынах того, чом Ґладышів не вславил ся ниякым судом, дознаме ся з його допису.

В части Люде можеме почытати перше о нашым будителю в статі авторства Михала Дзіндзя, котрого вважат Петро Трохановскій за найважнійшого біоґрафа Івана Русенка. То передрук статі з «Карпаторусского Календаря» Лемко-Союза на 1965 рік, яка была автором написана в червци 1964 рока на выгнаню в Бориславі, в УССР. Дальше почытаме в Лемківскым Річнику автобіоґрафію Ярослава Трохановского, нашого Маестро, котрый святкувал своі 80. уродины в минулым році. Заохочаме чытати, бо Маестро як раз пише місцево о собі з дозом гумору, як і здраджат, хто го найбарже інспірує в артистичній роботі. Того чытачам не повіме, мусите дочытати тото самы. Другу част публикациі Стоваришыня Лемків заперают два дописы про Богдана Ґамбаля, з втратом котрого дальше не можеме ся, як і Редакция, погодити. Першу статю написала для Річника др габ. Олена Дуць-Файфер, долголітня камаратка на ідеовых стежках Покійного. Другій допис то Пращальный Лист од Ярослава Трохановского, емоцийональный і з цілого серця щырый.

Остатня част «Лемківского Річника» 2020 – Ювіляре – єст тіж найкоротшом. Головный редактор в двох дописах представлят жытя осіб, якы заслужыли ся для Лемків та лемківской культуры і наукы. Бесіда є про спомненого скорше Ярослава Трохановского, музичный талант, якій такой ціле своє професийне жытя посвятил лемківскій справі, та про др габ. Олену Дуць-Файфер, завдякы котрій нашы еманципацийны процесы досягнули університетского рівня.

«Лемківскій Річник» 2020 єст вынятковый під парома взглядами, не лем єст долшый як попередні выданя, але і можеме чытати в ним професийні і добрі прирыхтуваны дописы тыкаючы важных справ, люди і річниц. Не мож попри тій публикациі перейти обоятні.

«Лемківскій Річник» 2010 мож уж придбати. Замовліня треба складати під адресом
„Łemkowski Rocznik” 2010 można już kupić. Zamówienie trzeba składać pod adresem

www.stowarzyszenielemkow.pl/sklep/

Za lem.fm : https://www.lem.fm/lemkivskij-richnik-2020-yest-uzh-dostupnyj/
Autor: Zygmunt Jakub redaktor Lem.fm