Іщы лем через місяц тырват Нацийональный Повселюдный Спис

przez adminsl . · Opublikowano 1 września 2021 · Zaktualizowano 1 września 2021

Нарід потрібує часто того, што додає силы, надіі і доброго пізріня на будуче.

Іщы лем через місяц тырват в Польщы Нацийональный Повселюдный Спис. Списаня ся то не лем наше право, але і громадяньскій обовязок выникаючый з законів. Хто того іщы не зробил – заохочуєме фурт до зробліня інтернетового самоспису.

Результаты спису можут мати ріжне значыня. Но, для нас – вызнаной державом меншыны – результаты спису будут мали предовшыткым значыня повязане з простым рахунком – кілько нас є, ци нас прибыло, ци може сме ся скорчыли. Тото, в порівнаню до списів з 2002 р. і 2011 р. може ся ріжнити.

Желаме сой заєдно, жебы результат был іщы раз поправленый, так як было то односно чысла Лемків в Польщы в 2002 р. і пак в 2011 р., кєд наша списова чысленніст такой ся здвоіла. Хоц офіцияльны даны, подля ріжных опіній, не оддзеркаляют реальной кількости Лемків в Польщы.

Але хосенны результаты спису можут мати і друге значыня. Є то повязане з тым, што называт ся морале (моральный дух), кєд же нарід потрібує часто того, што додає силы, надіі і доброго пізріня на будуче.

Напевно высшый процент осіб, якы задеклярюют лемківску (русиньску) нацийональніст і лемківскій язык як материньскій, доведе до того, што нашы надіі і стремліня до розвитку будут зміцнены.

Перед самым списом, а і протягом його тырваня, в Польщы тырвают просписовы кампаніі. Крім загальнорусиньской кампаніі («Сме Лемкы»), котру в Польщы найактивнійше веде Стоваришыня «Руска Бурса» в Ґорлицях, до котрой долучыло тіж Стоваришыня Лемків, ведена єст іщы єдна кампанія, орґанізувана через середовиско молодых активістів з Вроцлавя під назвом «ЯЛемко».

Нацийональный Повселюдный Спис зачал 01. квітня/апріля. До кінця вересня/септембра то вельо часу, жебы выполнити не лем громадяньскій обовязок, але предовшыткым обовязок взглядом предків і родины, сусідів ци просто краянів.

Інтернетовый формуляр выполнити мож на сайті www.spis.gov.pl. Ціліст занимат лем пару хвиль, но про нацийональны і етнічны меншыны найважнійше значыня мают два звіданя – про нацийональну приналежніст і язык, якым послугуєме ся дома.