Вмерла Яніна Дзядик (1949 – 2024). Вічная Памят!

З жальом інформуєме, што вмерла бл. п. Яніна Дзядик.

Покійна вродила ся 08 липця 1949 р. в Ліґницкым Поли на чужыні, в родині Василя і Татияны Святківскых, выселеных з Ізб. В маю 1987 р. выдала ся за Івана Дзядика зо Злоториі – по роді з Фльоринкы.

Разом з мужом через долгы рокы оддавала ся лемківскым справам. Была заанґажувана в орґанізацию Лемківскых Ватр в Михалові. Была акторком аматорского Театру Стоваришыня Лемків, якій творил ся в першых роках основаня нашой орґанізациі. Заграла в І -ій части фабулярного фільму Андрия Копчы – «Акция Вісла – Выгнаня».

Бл. п. Яніна Дзядик была добрым, теплым чловеком. Все усміхнена.

Стоваришыня Лемків передає щыры слова спілчутя мужови Іванови і цілій родині.

Похоронны богослужыня одбудут ся в 15 липця о 10.00 год. в православній церкви Воскресіня Христового в Ліґници, а пак на цмонтери в Ліґницкым Поли.

Вічная Памят!