Рушат акция рекрутация

Тепер уж кінчат ся матуры і вельо молодых люди застанавлят ся де студиюваты, котры кєрунок выбрати, штобы найти потім файну роботу. Тых вшыткых запрашаме на Університет Педаґоґічний в Кракові. Гев можете студиювати российску філолоґію з русиньско-лемківскым языком!
Тота специялізация возникла в 2001 р. як єдина в Польщи (і на світі) дидактычно-наукова структура на рівни высшого школьництва, котра вчыт специялістів в обсягу лемківского языка, культуры і літературы. Дидактычным пріоритетом єст вчыня учытели лемківского языка, але шыроко розвиваний єст тіж культурознавчий модул, де старат ся вывчыти специялістів в обшыри вшыткых сфер громадского жытя, в котрых хоснуваний єст лемківскій язык.
Студенты той специялізациі вчены сут в модели подвійной філолоґіі. По закінчыню студий сут выкваліфікуваныма специялістами в обсягу росийского языка і в обсягу лемківского языка. Лемкознавчы занятя ведены сут выключні в лемківскым языку. Окрем занять з дидактычного канону, студенты берут участ в вельох варштатах, (м.ін. музычных, журналістычных, фільмовых, поетыцкых), в школьных практыках, а тіж в культурознавчо-языковых практыках на обшырях заселеных през русиньскы спільноты в Польщи, Словациі, Сербіі і Хорвациі. Завдякы тому студенты мают свідоміст шыршого загальнорусиньского контексту, в котрым розвиват ся лемківска достоменніст і культура а тіж залежности
громадско-культурвой ситуациі меншыновых груп од політыкы і правной системы даной державы.

Філолоґія стисло спілдіє з лемківскым середовиском, головні зо Стоваришыньом Руска Бурса, Стоваришыньом Лемків і Стоваришыньом Лемківской Молодежы Чуга. Філолоґія спілпрацує тіж на науковым і дидактычным поли з університетами де вчат русиньского языка, то є в Пряшові (Словация) і Новым Саді (Сербія).
На основі вельох твореных через спілпрацівників і студентів росийской філолоґіі з русиньско-лемківскым языком текстів выдаваний єст лемкознавчий науковий перийодык «Річник Руской Бурсы». Студенты берут тіж участ в редаґуванию «Бесіды» і научного часопису русицистів YOU-RODIVYJ. Для охочых можлива є спiлпраца з радийом ЛЕМ.ФМ.
В рамках філолоґіі тырвают працы над ревіталізацийным проєктом, котрого ефектом має быти приготовліня і опубликуваня контекстового словника знорматывізуваного лемківского языка а тіж реконстукция і запис традыцийных лемківскых пісен.
На найліпшых студентів, окрем стипендиі ректора жде спецяльна міністерияльна, мотывуюча стипендия. Вшыткы науковы выiзды – на першым роцi на Лемковину, на другум до Руснакiв на Словацию i на третiм до Сербii, сут безплатны.
На студия можете ся записити од 1 червця до 8 липця на сторонi: rekrutacja.up.krakow.pl.
Не трапте ся, як не здоляте в тым часi ся зареєструвати. В вересни буде наступна рекрутация, але лiпше записати ся уж тепер. В процесi рекрутациi бере ся пiд увагу выник матуры з чужого языка. Коли ктосы з Вас має стару матуру, то вымогом для принятия буде бесiда на тему росийской i лемкiвской культуры / лiтературы. Лауреаты олiмпіяды з росийского языка сут прыняты поза процесом рекрутациi.
Штобы більше ся дознати як фунґує філолоґія і што ся в нас тепер діє, варто зазрити на нашу фейсбукову сторону Język łemkowski UP Kraków / Лемківскій язык на ПУ в Кракові. Гын з охотом будеме одповідаты на вашы звіданя.
(од-ф)