Вышол новий номер „Бесіды” Нр 2(149), 2016р

przez adminsl . · Opublikowano 28 kwietnia 2016 · Zaktualizowano 8 maja 2016

Доступний єст уж в продажы новий, передсвяточний номер часопису «Бесіда», пресового орґану Головного Заряду Стоваришыня Лемків. То двомісячник, выдаваний такой од моменту основаня орґанізациі в 1989 р. (перший номер «Бесіды», товды іщы квартальника, вказал ся 30. червця/юнія 1989 рока), будучий найдолше і доднес непрестанно выходячым русиньскым періодиком по політичных перемінах другой половины ХХ ст. в центральній і східній Европі.

Окрем постійных розділів з минулыма подіями, переглядом пресы, рецензиями книжковых выдань, гумором, літературныма творами, в найновшым номері двомісячника «Бесіда» мож найти м.ін. такы статі:

> Петра Трохановского – Долго вычекуваны народины Дня Русинів – реляция з Дня Русинів в Польщы
> Демка Трохановского – За нами перше спільне засіданя зарядів Стоваришыня Лемків і Руской Бурсы – реляция зо стрічы в Ліґници,
> Андрия Копчы – Медже Меджелабірцями а Осієком – річницьова статя з нагоды 25-літя Світового Конґресу Русинів,
> Наталіі Малецкой-Новак – Ден Материньского Языка,
> Петра Трохановского – Стріча сентиментальна або вічна (я) памят – о похороні в камяньскым костелі, котрий в давных часах міг быти церквом.

То уж 149. номер «Бесіды» (а другій тогорічний), котрой од самого початку шефредактором єст Петро Трохановскій, Єй окладинку такой все прикрашают прекрасны знимкы церкви, придорожных крестів і інчых пречудовых елементів краєвиду Лемковины, авторства Петра Басалыґы, фотоґрафіка з Крениці, будучого при редакциі «Бесіды» од самого початку, але і перше спілпрацуючого м.ін. з «Голосом Ватры» (выдаваным раз до рока при ватрах 1983-1989 р.) і документуючого першы Лемківскы Ватры в Чарній, Ганчовій і Бортным, коли до 1989 рока были они лемківскыма не лем в своій назві.

Обшырний архів «Бесіды», враз з найновшым номером, можете найти в чытальни бібліотекы Руской Бурсы, при ул. Сєнкєвіча 28 в Ґорлицях, де окрем того і інчых выдань, достанете тіж добру каву.