Лемківскій Річник 2015

 
Наклaдом Стоваришыня Лемків вышол Лемківскій Річник 2015. Выданя є посвячене істориі і культурі Лемків. 2015 рік – як пише во вступі шефредактор Петро Трохановскій – был роком принагідным, што значыт, же в Лемківскым Річнику 2015 повело ся помістити вельо важных річниц з істориі Русинів і жытя іх Будителів.

Подібні як попередні едициі Лемківскых Річників, і сесе выданя остало поділене подля змісту на пару розділів. Початок книжкы то ПОДІІ – місце в котрым прочытаме о найважнійшых річницях, звязаных з історийом Русинів. Друга част то ЛЮДЕ, де приведены сут персоналиі выдатных осіб. Окрем того, Лемківскій Річник 2015 припоминат нам о ювілеях жыючых персон з русиньского світа, в тогорічным выданю – русиньскых науковців.

ПОДІІ:
Петро Трохановскій – На памят 1000. річниці упокоіня Святого Рівноапостольного Князя Владиміра – (в навязаню до торжества, котре проходило в липци т.р., в Креници),
Репрінт – Народная История Руси – скан з 1875 рока,
Богдан Горбаль – Лемкы в Росиі 1915-1919 в контексті ексодусу русофільского населіня Галичыны і карпаторуского руху,
Андрий Докля – Прихід і одступліня рускых войск з Карпат,
Петро Трохановскій – Сімдесят років од закінчыня ІІ Світовой Войны і переселіня Лемків на Украіну,
Петро Кырпан – Порвані коралі – моноґрафія села Тылявы (ниґде перше не публикувана) – передана дівком Анном Кырпан,
Андрий Копча – Чом єм ся не вродил… на Украіні (на 70-ту річницю закінчыня ІІ Світовой Войны і переселіня Лемків на Совітску Украіну),
Нестор Репела – Голодны Рокы,
Петро Мурянка – выімок з книжкы А Вісла дале плыне;

ЛЮДЕ:
Петро Трохановскій – Округла Духновичова річниця (навязаня до 150. річниці смерти будителя Русинів – о. Александра Духновича),
Елейн Русинко – Аспекты посмодернізму в творчости і мысли Александра Духновича,
Александер Духнович – Остатня моя піснь
Севериян Косовскій – Хылякова незломніст – до 150. річниці народин і 60. смерти Міністра Внутрішніх Справ Руской Народной Республикы Лемків – о. Димитрия Хыляка,
В суді – выімок з судового процесу о. Димитрия Хыляка,
Петро Трохановскій – річниці ґу одсвіжыню памяти (біоґрамы корифеів нашой культуры, літературы, політикы ітд.);

ЮВІЛЯРЕ:
Валерій Падяк – Науковы маґістралі Професора Павла Роберта Маґочія (до 70 – тых народин Професора),
Петро Трохановскій – Пятдесят років Богдана Горбаля.
Лемківскій Річник мож почытати в бібліотеці Руской Бурсы в Ґорлицях, котра отворена єст в каждий понедільок в годинах 14.00-18.00, або по індивідуальным догваріню в інчым терміні. Позиция є тіж доступна в бібліотеці Кружка Стоваришыня Лемків в Ліґници, та очывидні можлива до придбаня в Стоваришыню Лемків, як і другых місцях, де книжка буде передана.